Türkmenistanyň gözel tebigatynyň oýanyp, bahar paslynyň ilkinji buşlukçylarynyň görünip başlan şu günlerinde, ýurdumyzyň deňiz derwezesi has-da dabaraly keşbe girdi. 2026-njy ýylyň 4-nji martynda “Balkan” gämi gurluşyk we abatlaýyş zawody” açyk görnüşli paýdarlar jemgyýetiniň mejlisler zalynda Halkara zenanlar güni mynasybetli guralan çäre hakyky baýramçylyk şowhunyna öwrüldi.

Dabaranyň başynda bellenilişi ýaly, türkmen zenany ähli döwürlerde-de mukaddesligiň, wepalylygyň we asyllylygyň nusgasy hökmünde uly hormatdan peýdalanyp gelýär. Çärä Türkmenistanyň Deňiz we derýa ulaglary döwlet gullugynyň merkezi edarasynda, onuň garamagyndaky edara-kärhanalarda hem-de paýly gatnaşýan paýdarlar jemgyýetlerinde zähmet çekýän, pudagyň ösmegine öz goşandyny goşýan döwrebap aýal-gyzlar gatnaşdylar.

Baýramçylygyň iň tolgundyryjy we dabaraly pursady bolsa, hormatly Prezidentimiziň adyndan gowşurylan sowgatlar boldy. Ýurdumyzda her ýyl däp bolup gelýän asylly ýörelgä eýerilip, dabaranyň dowamynda aýal-gyzlara 60 (altmyş) manat möçberindäki pul sowgatlary uly buýsanç bilen gowşuryldy. Bu sowgatlar döwletimiziň zenan mertebesine, olaryň maşgaladaky we jemgyýetdäki orunlaryna goýýan belent sarpasynyň aýdyň nyşanyna öwrüldi.

Dabara gatnaşan gyz-gelinler öz çykyşlarynda döredilýän şeýle giň mümkinçilikler, zenanlaryň zähmet çekmegi we bagtyýar durmuşda ýaşamagy üçin edilýän yzygiderli aladalar üçin halkymyzyň Milli Lideri Gahryman Arkadagymyza we Arkadagly Gahryman Serdarymyza özleriniň tüýs ýürekden çykýan minnetdarlyklaryny we alkyş sözlerini beýan etdiler.

Çäre pudakda zähmet çekýän zenanlaryň baýramçylyk ruhuny has-da belende göterip, olaryň döredijilikli zähmete bolan höwesini artdyrdy. Baharyň ilkinji günleriniň şeýle dabaraly başlamagy, ýurdumyzyň her bir ojagyna bagt we rowaçlyk getirjekdiginiň buşlukçysy boldy.