“Türkmenistan” awiakompaniýasynyň ýolagçylary indi halkara gatnawlary amala aşyrýan iri uçarlaryň ýolagçy salonynda wagtyňy geçirmek üçin mugt multimediýa ulgamyndan peýdalanyp bilerler. Täze hyzmat ýolagçylar üçin oňaýlylygy ýokarlandyrmakdan we amatly gurşawy döretmekden ybaratdyr. Bu barada Türkmenistanyň resmi metbugaty habar berdi.

Ulgama birikmek üçin ýolagçylara mobil enjamyny “Uçarda” ýagdaýyna geçirmek we “Wi-Fi” ulgamyny açmak we “Türkmenistanairlines” toruny saýlamak gerek. Gözleg brauzerini açanyňdan soň, girizmek arkaly “adonisone.com” salgysyna ýa-da QR kod arkaly şol salga aralaşyp bolar. Mundan soň ulanyjylar ekranyň ýüzünden özlerine düşnükli bolan dili saýlap, güýmenje portalyndan peýdalanyp bilerler.

Ulgamda kinematograflaryň täze eserleri, nusgawy filmler, multfilmler, ses ýazgyly kitaplar, aýdym-sazlar we žurnallar hödürlenilýär. Ondaky mazmunyň köpdürlüligi ýolagçylara öz islegine görä güýmenjeleri saýlap, uçuşdan lezzet almaga mümkinçilik berýär.

Bu başlangyç awiakompaniýanyň öz uçarlaryndaky ýolagçy salonynda ýokary derejeli hyzmaty we amatlylygy üpjün etmäge tagalla edýändigini görkezýär.