Türkmenistanyň Prezidenti Serdar Berdimuhamedow  Ministrler Kabinetiniň we Döwlet howpsuzlyk geňeşiniň giňişleýin mejlisiniň dowamynda “Magtymguly – dünýäniň akyldary” atly täze kitabyny ýazyp tamamlandygyny aýtdy. Bu barada Türkmenistanyň resmi metbugaty habar berýär.

Täze neşirde beýik şahyryň edebi mirasy, onuň dünýä medeniýetine goşan goşandy hem-de Magtymguly Pyragynyň ýubileý senesiniň bellenilen ýylynda geçirilen çäreler barada giňişleýin beýan edilýär.

Habarda bellenilişi ýaly, kitapda diňe bir şahyr barada däl, eýsem, Türkmenistanyň ýeten sepgitleri we üstünlikleri barada hem gürrüň berilýär. Täze neşir türkmen halky üçin ajaýyp sowgada öwrüler.

Ministrler Kabinetiniň Başlygynyň orunbasary, daşary işler ministri Raşid Meredow kitabyň Täze ýylyň öňüsyrasynda çapdan çykmagynyň Türkmenistanyň raýatlary, şol sanda daşary ýurtly okyjylar üçin hem möhüm waka öwrülendigini nygtap, täze eseriň medeni mirasy gorap saklamakda gymmatly çeşme boljakdygyna ynam bildirdi.

Raşid Meredow mejlise gatnaşyjylaryň adyndan Türkmenistanyň döwlet Baştutanyny täze kitabyny ýazyp tamamlamagy bilen gutlap, täze döredijilik üstünliklerini, berk jan saglygyny, alyp barýan asylly işlerinde mundan beýläk-de üstünlikleri arzuw etdi.