2025-nji ýylyň 18-nji martynda Türkmenistanda Senagatçylar we telekeçiler birleşmesiniň, Söwda-senagat edarasynyň guramagynda we “TMT Consulting Group” kompaniýasynyň ýardam bermeginde “Türkmenistanyň geljegine maýa goýum” (IFT 2025) atly halkara forum geçiriler. Bu barada çäräni guraýjylar habar berýär.

Forum hususy pudagyň maýa goýum mümkinçiliklerini maslahatlaşmak, tejribe alyşmak, döwlet we hususy pudaklaryň arasynda işewürlik gatnaşyklary ýola goýmak üçin möhüm meýdança öwrüler.

Bu çärä öňdebaryjy maýadarlar, telekeçiler, maliýe edaralarynyň we döwlet düzümleriniň wekilleri gatnaşarlar. Forum senagat, ulag, oba hojalygy, maglumat tehnologiýalary ýaly ugurlarda geljegi uly taslamalaryň ara alnyp maslahatlaşylýan ýerine öwrüler. Oňa gatnaşyjylar hususy işewürligi goldamak boýunça çäreler barada öwrenip, halkara we ýerli maýadarlar bilen gatnaşyklary ýola goýup hem-de işewürlik we maýa goýum işini alyp barmagyň iň gowy dünýä tejribesi boýunça bilermenler maslahatlaryna gatnaşyp bilerler.

Türkmenistanyň telekeçileri geljegi uly maýadarlara we hyzmatdaşlara özleriniň taslamalary barada tanyşdyryp bilerler. Foruma gatnaşmak üçin hasaba alyş işi eýýäm açyldy. Giňişleýin maglumat we hasaba aldyrmak üçin forumyň www.ift.com.tm  salgyly resmi web-saýtyna aralaşyp bilersiňiz.