2025-nji ýylyň 3-nji fewralynda Astanada Türkmenistan bilen Gazagystan Respublikasynyň Daşary işler ministrlikleri arasynda syýasy geňeşmeler geçirildi. Bu barada DIM-iň resmi habarlary habar berýär.

Türkmen tarapyna Ministrler Kabinetiniň başlygynyň orunbasary, Türkmenistanyň Daşary işler ministri Raşid Meredow, Gazagystan bolsa premýer-ministriň orunbasary, Gazagystan Respublikasynyň Daşary işler ministri Murat Nurtleu ýolbaşçylyk etdi.

Duşuşygyň dowamynda ýolbaşçylar özara peýdaly hyzmatdaşlyk ýörelgelerine esaslanan türkmen-gazak gepleşikleriniň netijeli häsiýetini kanagatlanma bilen bellediler.

Geňeşiň çäginde taraplar ikitaraplaýyn gün tertibi barada konstruktiw pikir alyşmalar ýola goýuldy, hususan-da, taraplar syýasy-diplomatik, söwda-ykdysady we medeni-gumanitar hyzmatdaşlygyň häzirki ýagdaýyny seljerip baha berdiler, olaryň durmuşa geçirilişine syn berdiler we geljek üçin bilelikdäki çäreleri ara alyp maslahatlaşdylar.

Taraplar ýokary derejedäki duşuşyklaryň möhüm ähmiýetine ünsi jemläp, bu duşuşyklaryň ikitaraplaýyn hyzmatdaşlygy güýçlendirmekde esasy faktor bolup durýandyklary barada ylalaşdylar.

Gepleşikleriň dowamynda taraplar “Halkara Parahatçylyk we Ynanyşmak” ýylynda bilelikdäki geçiriljek  çäreleri ara alyp maslahatlaşdylar.

Bu nukdaýnazardan halkara guramalarynyň, hususan-da BMG, OIC we ECO-nyň çäginde iki ýurduň arasyndaky özara gatnaşyklaryň ýokary derejesi we oňyn tejribesi nygtalýar. Diplomatlar taraplaryň köptaraplaýyn gatnaşyklary has-da  pugtalandyrmaga taýýardyklaryny mälim etdiler.

Ministrler köpugurly gepleşikleriň ösmegine goşant goşjak parlamentara gatnaşyklary güýçlendirmek meselesine ünsi çekdiler. Şeýle hem, iki ýurduň daşary işler ministrlikleriniň arasyndaky gatnaşyklaryň depginini we dinamikasyny güýçlendirmek barada ylalaşdylar.

Bular bilen bir hatarda söwda we ykdysady ugurda hyzmatdaşlygy ösdürmek bilen baglanyşykly birnäçe meseleler ara alnyp maslahatlaşyldy. Ykdysady, ylmy, tehniki we medeni hyzmatdaşlyk boýunça hökümetara türkmen-gazak toparynyň ähmiýeti bellenildi. Ministrler ýangyç we energiýa, ulag we aragatnaşyk, söwda we senagat pudaklary ýaly ykdysadyýetiň ileri tutulýan ugurlarynda hyzmatdaşlygy ösdürmek meselelerini ara alyp maslahatlaşdylar.

Taraplar medeni, ylmy we bilim gatnaşyklaryny çuňlaşdyrmagyň we saglygy goraýyş, sport we beýleki ugurlardaky özara gatnaşyklary ösdürmegiň tarapdarydyklaryny bellediler.

Geňeşiň ahyrynda diplomatlar köp ýyllyk dostluk we hoşniýetli goňşuçylyk gatnaşyklaryna esaslanýan gatnaşyklaryň iki dogan halkyň bähbidi üçin üstünlikli ösjekdigine berk ynanýandyklaryny mälim etdiler.