2025-nji ýylyň 17-nji ýanwarynda Hazarýaka döwletleriniň gatnaşmagynda III Hazar ykdysady forumy Tähranda öz işine başlady. Foruma Azerbaýjandan, Eýrandan, Russiýadan, Türkmenistandan we Gazagystandan ulag-aragatnaşyk we söwda guramalarynyň ýolbaşçylary, telekeçiler we iri kompaniýalarynyň wekilleri gatnaşýarlar, bu barada The Caspian Post saýty habar berýär.

Forumyň maksady Hazarýaka döwletleriniň arasyndaky ykdysady, söwda, ylmy we tehnologiki hyzmatdaşlygy pugtalandyrmak. Hususan-da ol energiýa, maliýe, syýahatçylyk, saglygy goraýyş, erkin söwda zolaklaryna maýa goýumlar we logistika pudaklary boýunça ugurlary öz içine alýar.

Bäş sany Hazarýaka döwletleriň wekilleriniň hyzmatdaşlygy pugtalandyrmak we ministrlikler derejesinde tapgyrlaýyn ýygnaklar arkaly şertnamalary durmuşa geçirmek boýunça çäreleri beýan etjek gutarnykly jarnama gol çekilmegiň meýilleşdirilýändigi barada habar berildi.

Hazar deňzinde söwda we ykdysady hyzmatdaşlyk baradaky Ylalaşyga 2018-nji ýylyň awgust aýynda Gazagystanda gol çekildi. Ylalaşygyň 5-nji maddasyna laýyklykda, Hazaryň ykdysady forumy öz nobaty boýunça Hazarýaka ýurtlaryň her haýsynda geçiriler. Ilkinji Hazar ykdysady forumy we sergisi 2019-njy ýylyň awgust aýynda Awazada geçirildi. Ikinji forum bolsa 2022-nji ýylyň oktýabr aýynda Moskwada geçirildi.