Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow anna güni Aşgabat şäheri boýunça iş saparyny amala aşyryp, durmuş maksatly möhüm desgalaryň gurluşygynyň barşy bilen tanyşdy. Bu barada Türkmenistanyň resmi metbugaty habar berýär.

Türkmen döwlet binagärlik-gurluşyk institutynyň gurluşyk meýdançasy saparyň dowamynda barlan esasy ýerleriň biri boldy. Bu ýerde döwrebap okuw toplumynyň gurluşygy alnyp barylýar.

Gurbanguly Berdimuhamedow taslama çözgütler, şol sanda okuw otaglarynda, umumy ýaşaýyş jaýlarynda we mugallymlar üçin ýaşaýyş binasynda dörediljek şertler bilen tanyşdy hem-de bezeg işlerini milli däplere laýyklykda has-da kämilleşdirmek boýunça maslahatlary berdi.

Wise-premýer Baýmyrat Annamämmedow Türkmenistanyň Senagatçylar we telekeçiler birleşmesiniň ýokary okuw mekdebiniň gurluşygynyň barşy barada hasabat berdi.

Soňra Gurbanguly Berdimuhamedow “Güneşli” çagalar we ýetginjekler merkeziniň taslamasy bilen tanyşdy. Onda çagalaryň medeni we beden taýdan ösüşi üçin ähli şertler, şol sanda amfiteatr, oýun zolaklary we ýol hereketiniň düzgünlerini öwrenmek üçin meýdançalar dörediler. Türkmen halkynyň Milli Lideri ýaşlaryň terbiýesine toplumlaýyn çemeleşmegiň möhümdigini belledi.

Saparynyň ahyrynda Gurbanguly Berdimuhamedow durky täzelenilýän Ahalteke atçylyk toplumyna bardy hem-de onuň çägini abadanlaşdyrmak we çapuw ýodalaryny döwrebaplaşdyrmak boýunça taslamalar bilen tanyşdy. Şeýle hem tohum atlaryň saklanylmagy üçin oňaýly bolan Garagum sährasynyň çägesini ulanmak meselesine hem garaldy.