2023-nji ýylyň 28-nji sentýabrynda “Turkmendeňizderýaýolary” agentligi tarapyndan hünärmenleriň başarnyklaryny we ukyplaryny ýokarlandyrmak we tejribe alyşmak maksady bilen “Çarlak” myhmanhanasynyň mejlisler zalynda okuw maslahaty geçirildi. Bu okuw maslahata “Turkmendeňizderýaýolary” agentliginiň ykdysadyýet we meýilleşdiriş bölüminiň hünärmenleri we onuň garamagyndaky edara-kärhanalaryň işgärleri gatnaşdy.

Okuw maslahatynyň dowamynda, ýanwar-sentýabr aýlary aralygynda geçirilen işleriň netijeleri we berlen tabşyryklaryň ýerine ýetirilmegi bilen baglanyşykly meseleler ara alnyp maslahatlaşyldy. Ykdysadyýet we meýilleşdiriş bölüminiň hünärmenleri Agentligiň garamagyndaky edara-kärhanalary tarapyndan ýerine ýetirilen işleriň we 2023-nji ýylyň ýanwar-sentýabr aýlary aralygynda gazanylan maliýe we ykdysady görkezijileriň jikme-jik seljermesi babatynda çykyş etdiler. Türkmenbaşy Halkara deňiz portunyň kuwwatyny ýokarlandyrmak, gaýry girdeji çeşmelerini köpeltmek we müşderiler üçin ýük daşamak üçin amatly şertleri döretmek bilen baglanyşykly meseleler ara alnyp maslahatlaşyldy.

Söwda deňiz floty şu ýylyň 9 aýynyň dowamynda ýük geçirijiliginiň mukdary barada çykyş etdiler. Ösüş depginleriniň ýokarlanmagy, ilkinji nobatda, çig nebit önümleriň eksportynyň köpelmegi, ýurduň milli daşaýjysy hökmünde ygtybarlylygy, durnuklylygy we ýeňillikli arzanladyşlary bilen tapawutlanýan flot gämileri saýasynda ýük iberijileri höweslendirmek arkaly ýükleriň köpelmegi bilen baglanyşyklydyr.

“Balkan” gämi gurluşyk we abatlaýyş zawody bilen baglanyşykly taýýarlyklara we onuň täze ösüşlerine aýratyn üns berildi. Gämi gurluşyk zawodynda täze gämileriň gurulmagy bilen, zawodda birnäçe täze iş orunlarynyň açylmagy garaşylýar. Zawodyň geljekki işgärleri üçin aýlyk zähmet hakynyň hasaplamalary görkezildi.

Maslahatyň ahyrynda Agentligiň işgärleri Hormatly Prezidentimiz Serdar Berdimuhamedowa ýurduň ykdysadyýetiniň ähli pudaklaryny ösdürmek babatynda şeýle giň mümkinçilikleri döredendigi üçin minnetdarlyk bildirdiler.