Niderlandlar Patyşalygynyň “Damen Shipyards Gorinchem” kompaniýasynyň wekilleriniň Türkmenistana saparynyň çäklerinde, 2024-nji ýylyň 19-njy noýabrynda Türkmenbaşy şäherinde “Türkmendeňizderýaýollary” agentliginiň we “Balkan gämi gurluşyk” paýdarlar jemgyýetiniň ýolbaşçylary arasynda duşuşyk geçirildi. Duşuşygyň barşynda ikitaraplaýyn hyzmatdaşlygyň mümkinçilikleri ara alnyp maslahatlaşyldy.

Kompaniýanyň wekilleri daşary ýurtlaryň gämi gurluşyk zawodlarynda birnäçe gämini üstünlikli gurup, ulanmaga tabşyrylandygyny habar berdiler. Olar Türkmenistan tarapy bilen bilelikde gämi gurluşyk taslamalaryna gatnaşmaga gyzyklanma bildirýändigini bellediler. Şeýle-de gelejekde ikitaraplaýyn hyzmatdaşlygyň dürli ugurlary boýunça pikir alyşyldy.

Duşuşygyň dowamynda “Balkan” gämi gurluşyk we abatlaýyş zawody barada tanyşdyryş wideoýazgy görkezildi we zawodyň mümkinçilikleri barada gürrüň berildi. Duşuşygyň ahyrynda myhmanlar zawodyň mümkinçilikleri bilen ýerinde tanyşdylar we bu ýerde döredilen mümkinçiliklere ýokary baha berdiler.