2026-njy ýylyň 20-nji aprelinde Türkmenbaşy Halkara deňiz portunyň ýolbaşçy düzümi bilen Täjigistan Respublikasynyň Hökümetiniň ýanyndaky Döwlet maddy ätiýaçlary boýunça agentliginiň wekilleriniň arasynda iş duşuşygy geçirildi. Saparyň esasy maksady portuň tehniki mümkinçilikleri we üstaşyr ýükleri daşamakda hödürleýän amatlyklary bilen tanyşmakdan ybarat boldy.

Duşuşygyň dowamynda täjik wekillerine Türkmenbaşy Halkara deňiz portunyň kuwwaty, logistik düzümi we halkara üstaşyr geçelgelerindäki ähmiýeti barada giňişleýin maglumat berildi. Agentligiň wekilleri häzirki wagtda portuň mümkinçiliklerinden peýdalanyp, dürli görnüşli harytlary halkara ugurlar boýunça üstaşyr geçirmegi meýilleşdirýändiklerini we eýýäm synag görnüşinde ilkinji ýük gatnawlarynyň ýola goýlandygyny bellediler. Hususan-da, multimodal daşamalarynyň netijeliligini barlamak maksady bilen, parom gatnawlary arkaly amala aşyrylýan ilkinji ýük kerwenleriniň tiz wagtda portuň üsti bilen bellenen nokada ugradyljakdygy nygtaldy.

Öz gezeginde, Türkmenbaşy Halkara deňiz portunyň hünärmenleri Täjigistan Respublikasyna ugradyljak ýükleriň bökdençsiz we çalt amala aşyrylmagy üçin ähli şertleriň dörediljekdigini tassykladylar. Iki tarap hem geljekde üstaşyr ýük dolanyşygyny artdyrmak we ulag-logistika ulgamyndaky hyzmatdaşlygy täze derejä çykarmak ugrunda işjeň gatnaşyklary dowam etdirmäge taýýardyklaryny bildirdiler.