Türkmenistan Ýewropa bilen Aziýanyň arasynda möhüm ulag merkezine öwrülip biler. Biziň ýurdumyz Hazar deňzinde häzirkizaman port infrastrukturasynyň bolmagy bilen, materikde ýükleriň üstaşyr geçmegi üçin halkara ulag hökmünde ähmiýeti diňe artýar, diýip Ministrler Kabinetiniň ýanyndaky Ulag we kommunikasiýalar agentliginiň Baş direktorynyň orunbasary Batyr Annaýew maýadarlar forumyna mälim etdi.

Türkmenistanyň wekiliýetiniň düzüminde Ministrler Kabinetiniň ýanyndaky Ulag we kommunikasiýalar agentliginiň Baş direktorynyň orunbasary Batyr Annaýew, Döwlet gümrük gullugynyň başlygynyň orunbasary Muhammet Muhammedow, «Türkmendeňizderýaýollary» agentliginiň başlygynyň orunbasary Seýitguly Baýseýidow,  «Türkmendemirýollary» agentliginiň başlygynyň orunbasary Bekmyrat Işangulyýew, «Türkmenistanyň Ulag-logistika merkezi» AGPJ-niň Baş direktory Merdan Bäşimow, şeýle hem Türkmenistanyň Belgiýadaky ilçisi Sapar Palwanow foruma gatnaşýarlar.

Türkmenistanyň ulag mümkinçiliklerini görkezmek bilen, soňky ýyllarda ýurdumyz infrastrukturany ösdürmäge, ýagny demirýollaryna, awtoulag ýollaryna, howaýollaryna we deňizýollaryna işjeň maýa goýandygyny Batyr Annaýew belledi. Häzirki wagtda bäş müň kilometrden gowrak polat ýollary sebitleriň arasynda ygtybarly aragatnaşygy üpjün edip, möhüm üstaşyr potensialyna eýe bolup durýar. Ýylda 17 million tonna kuwwatlylygy bolan Türkmenbaşy Halkara deňiz porty, ýurdumyzyň günbatar böleginiň dünýä söwda ýollaryna çykýan esasy ulag merkezi bolup hyzmat edýär. Awiasiýa pudagynda täze taslamalaryň durmuşa geçirilmegi, ýagny ýedinji howa menziliniň gurulmagy, milli howa menzilleriniň kuwwatyny  sagatda 3800 ýolagça artdyrar. Ýük daşamak babatyndaky logistikasy üçin strategiki ähmiýete eýe bolan 600 kilometrlik Aşgabat-Türkmenabat awtoulag ýolunyň ikinji bölümi işe girizmäge taýýarlanýar.

Üpjünçilik zynjyryny dolandyrmakda häzirkizaman näbellilik şertlerinde, Merkezi Aziýanyň ýurtlaryndan geçýän ulag ugurlary diňe bir durnukly we howpsuz ýük daşamagy üçin uly mümkinçilikleri hödürlemän, eýsem Ýewropanyň kompaniýalary üçin maýa goýum mümkinçiliklerini hem hödürleýär. “Bu nukdaýnazardan, ulag infrastrukturasyny ösdürmekde tejribe alyşmak, ulag akymlaryny dolandyrmak üçin sanly tehnologiýalary ornaşdyrmak, şeýle hem ýurdumyzda bar bolan logistika kuwwatlylygyny ulanmakda we serhetde täze söwda we logistika merkezlerini döretmekde gyzyklanma bildirýän Ýewropanyň iri logistika operatorlaryny garşylaýarys” – diýip Batyr Annaýew öz çykyşynda aýtdy.

Merkezi Aziýa ýurtlary bilen Ýewropa Bileleşiginiň ulag ulgamyndaky hyzmatdaşlygy sebitde ykdysady gatnaşyklary pugtalandyrmakda möhüm goşantdyr diýip, Batyr Annaýew ähli gyzyklanýan taraplary ulag hyzmatdaşlygy babatynda taslamalaryny ara alyp maslahatlaşmaga çagyrdy.

Forumyň birinji gününde Merkezi Aziýada durnukly ulag aragatnaşygyny üpjün etmek üçin birnäçe anyk borçnamalar yglan edildi. Paralel tematiki sessiýalarda Merkezi Aziýa bilen Ýewropanyň arasynda üstaşyr wagtyny azaltmak, amaly netijeliligi ýokarlandyrmak, ýerüsti ulag infrastrukturasyny we multimodallyk we logistika nukdaýnazaryndan beýleki aragatnaşyk meselelerini gowulandyrmak mümkinçilikleri bellenilip geçildi.